شنبه 27 عقرب|آبان 1396 برابر با 18 نومبر 2017

باشنده‌گان بلخ به خاطر حل پرونده‌های حقوقی‌شان به شورای ولایتی مراجعه می‌کنند



 29 ثور|اردیبهشت 1396

 

برخی از باشنده‌گان بلخ می‌گوید که افزایش اختلاس، رشوه‌ستانی و بی‌مسؤولیتی در نهادهای عدلی و قضایی این ولایت آنان را نسبت به این نهادها بی‌باور ساخته است.

 به گفتۀ آنان، باشنده‌گان بلخ بیشر برای حل‌وفصل پرونده‌های‌شان به دیگر نهادها مراجعه می‌کنند.

رحمت‌الله، یک‌تن از باشنده‌گان شهر مزارشریف به سلام‌وطندار می‌گوید، مردم به علت افرایش فساد به نهادهای عدلی و قضایی بی‌باور شده‌اند. او می‌گوید، بیشتر مردم پرونده‌های‌شان را به همکاری شورای ولایتی این ولایت حل می‌کنند.

بانو آزاده، از دیگر شهروندان مزارشریف روایتی از چشم دید خودش دارد، او می‌گوید: « از درِ وردی تا مقام‌های این نهادها آزادانه درخواست رشوه می‌کنند، در صورتی که به خواست‌شان پاسخ مثبت ندهی، اخطار حبس چندین ساله را برایت می‌دهند، حتا اگر بی‌گناه هم باشی.»

به گفتۀ بانو آزاده، پرونده‌های مراجعه‌کننده‌گان به دلایل گونه‌گونه به تأخیر انداخته می‌شوند تا زمینۀ رشوه‌ستانی برابر شود.

محمد رفیق برومن، آگاهان مسایل حقوقی در بلخ نیز از موجودیت فساد گسترده در نهادهای عدلی و قضایی نگرانی کرده می‌گوید، مردم به این نهادها بی‌باور شده‌اند و به خاطر حل پرونده‌های حقوقی‌شان به متنفذین و شورای ولایتی مراجعه می‌کنند.

 سیدعبدالله مسرور، معاون شورای ولایتی بلخ نیز تأیید می‌کند که باشنده‌گان این ولایت برای حل‌و‌فصل پرونده‌های‌شان به شورای ولایتی می‌آیند.

به گفتۀ آقای مسرور، شورای ولایتی به عنوان پل ارتباطی میان شهروندان و نهادهای عدلی و قضایی عمل می‌کند.

خواستیم در این باره دیدگاه مسؤولان نهادهای عدلی و قضایی را نیز داشته باشیم، اما با تماس‌های پی‌هم حاضر به گفت‌وگو نشدند.