آدينه 6 اسد|مرداد 1396 برابر با 28 جولای 2017

عبدالرحیم، پس از ترک اعتیاد دیگر معتادان را درمان می‌کند



 7 سرطان|تیر 1396

 

عبدالرحیم رجایی، فردی که پیش از این معتاد به مواد مخدر بود، حدود یک‌سال می‌شود که صحت‌یاب شده و مرکزی را زیرنام «پل امید و صحت» برای درمان معتادان ساخته است. او می‌گوید، پس از درمان تلاش کرده تا جان دیگر معتادان را نیز نجات دهد.

عبدالرحیم رجایی، امروز (چهارشنبه) در نشستی خبری زیر نام « با ما همکاری کنید نه توهین» می‌گوید، پس از ترک مواد مخدر تصمیم گرفت تا دیگر معتادانی را که قصد ترک مواد مخدر را داشته باشند، نجات دهد. او می‌گوید، تا کنون 11 معتاد را از طریق مشوره، درمان کرده‌اند.

او همچنان از مردم می‌خواهد که با معتادان رفتارزشت و توهین‌آمیز نکرده، بل با آنان کمک کنند.

عطاالرحمان حامد، مشاور حقوقی موسسۀ «پل امید و صحت» می‌گوید که حکومت و شهروندان کشور باید به معتادان به عنوان بیمار ببینند نه مجرم.

او می‌گوید، هدف از ایجاد موسسۀ «پل امید و صحت»، جلب توجۀ حکومت و مردم به معتادان است.

آقای حامد می‌افزاید، در حال‌ حاضر 21 مرکز درمان معتادین در شهر کابل فعالیت دارند، اما آنان تنها در زیر پل سوخته و سرای شمالی زخم‌های معتادین را پاسمان و به آنان مشوره می‌دهند.

فرید فریدی، نیز بیش از 10 سال مواد مخدر استفاده کرده است. او که به تازه‌گی با کمک موسسۀ «پل امید و صحت» مواد مخدر را ترک کرده می‌گوید، رفتار مشاوران و کارمندان موسسۀ «پل امید و صحت» نسبت به حکومت بهتر است.

به گفتۀ او، حکومت با معتادان رفتار خشن دارد و آنان را لت‌وکوب می‌کند.

مسؤولان موسسۀ «پل امید و صحت» می‌افزایند که حکومت باید برای درمان معتادان بیشتر تلاش کنند و همچنان مواد مخدری را که سالانه به آتش می‌کشد از آن برای معتادان دارو بسازد.