دوشنبه 30 دلو|بهمن 1396 برابر با 19 فبروری 2018

خانه‌نشینی ده‌ها زن در ولایت لوگر در نتیجه‌ی ناامنی



 24 دلو|بهمن 1396

 

شماری از زن‌ها در ولایت لوگر که قبلن در نهادهای دولتی و غیردولتی این ولایت مشغول به کار بودند، می‌گویند که به‌دلیل ناامنی وظایف‌شان را ترک کرده‌اند.

مروه و مریم دو تن از کسانی‌اند که یکی تجربه‌ی هفت سال کار با دولت را دارد و دیگری کارمند مؤسسه‌یی خارجی بوده است، اکنون هردو ترک وظیفه گفته‌اند.

این زن‌ها از حکومت می‌خواهند که امنیت را تأمین کند تا آن‌ها بتوانند دوباره به کارشان برگردند.

با این‌حال شیما زرگر، رییس امور زنان لوگر می‌گوید در کنار ناامنی، رسم و رواج‌های ناپسند حاکم بر فضای خانواده‌ها یکی دیگر از دلیل‌هایی است که زن‌ها را از کارکردن در بیرون بازمی‌دارد.

به‌گفته‌ی بانو زرگر، دخالت جامعه‌ی مدنی در حل تنشی که میان زن‌های کارمند و خانواده‌های‌شان وجود داشت در این ولایت سودمند واقع شده است. به همین دلیل، شمار زن‌هایی که در اداره‌های دولتی و غیردولتی کار می‌کنند کم نیست.

سلیم صالح، سخنگوی والی لوگر به سلام‌وطندار می‌گوید که تنها در ماه جاری خورشیدی 11 زن در اداره‌های دولتی و غیردولتی به کار گماشته شده‌اند.

به‌رغم این، ترک وظیفه در میان زن‌های ولایت لوگر یکی از پیامدهای گسترش ناامنی در سرتاسر کشور است.