شنبه / ١٣٩٦ / چنګاښ - ٣ / ٢٠١٧ کال / جون - ٢٤

نواک جاکویک د ۲۰۱۷ کال د ټینس لومړۍ اتلولي وګټله




 ٢١ مرغومی ١٣٩٥

 

د ټینس لوبغاړي نواک جاکویک سرسخت برېټانوي سیال انډي موري ته په ماتې ورکولو سره نه یوازې له نوموړي د تېرې ماتې غچ واخیست؛ بلکې د روان کال ټینس لومړۍ اتلولي هم وګټله.

د سیالیو د رسمي وېبپاڼې د معلوماتو له مخې، سربیایي جاکویک خپل سیال ته د قطر ازادو ټینس سیالیو په وروستۍ لوبه کې چې نږدې ۳ ساعته روانه وه؛ له یوې په زړه پورې لوبې وروسته له ۳ نه په ۲ سیټونو کې ماتې ورکړه.

د قطر په پلازمېنې دوحه کې په دې اتلولۍ سره مشهور لوبغاړي نواک جاکویک ۲ سوه ۹ زره  ۶۶۵ ډالر او د انعام په توګه د سیالیو د اتلولۍ جام ترلاسه کړ.

نواک جاکویک پخوا د ټینس نړۍ لومړی لوبغاړی و؛ خو د تېر کال په وروستي ټورنمېنټ کې له برېټانوي انډي موري نه د ماتې په خوړلو سره دغه مقام له لاسه ورکړ.

له بل لوري بیا په نړیوالو ټینس سیالیو کې د برېټانوي انډي موري د ۲۸ سر په سر بریاوو واکمني هم په دې ماتې سره پای ته ورسېدله.

د اتلولۍ له ګټلو وروسته نواک جاکویک رسنیو سره په خبرو کی وویل، لوبه او د سرسخت سیال خلاف د اتلولۍ ګټل اسانه نه وو.

د جاکویک پر وینا، دا چې د روان کال لومړۍ اتلولي وه؛ خوشاله دی او باید راتلونکې اوونۍ د سترو اتلولیو له پاره نورې خوارۍ هم وکړي.

دواړه لوبغاړي به اوس له دوحې نه د اسټرالیا په سترو ګرانډ سلام سیالیو کې د ګډون له پاره  اسټرالیا ملبورن ته ولاړ شي.