دوشنبه / ١٣٩٦ / چنګاښ - ٥ / ٢٠١٧ کال / جون - ٢٦

رفسنجاني خاورو ته وسپارل شو




 ٢١ مرغومی ١٣٩٥

 

د ایران پخواني ولسمشر او وتلي انقلابي لوبغاړي اکبر هاشمي رفسنجاني د جنازې لمونځ امامت د دغه هېواد مذهبي مشر ایت‌الله خامنه‌اي و کړ.

د اکبر رفسنجاني جنازه کې سمون غوښتونکي زیات ګډون کړی و، ځکه نوموړی په وروستيو کلونو کې د دغه خوځښت له مخکښانو ګڼل کېده.

له بل لوري د ایران ولسمشر حسن روحاني او د ایران مذهبي مشر ایت‌الله خامنه‌اي د پخواني ولسمشر اکبر هاشمي رفسنجاني د اسلامي انقلاب یو لوی شخصیت بللی او کورنۍ ته يې د تسلیت مراتب وړاندې کړې دي.

هغه د ایران مذهبي مشر سره د نظر سخت اختلاف درلود.

ایت‌الله خامنه‌اي يې په هکله ویلي، چې په دغې اوږده موده کې د نظر اختلاف هېڅکله د دوی ملګرتیا خرابه نه‌کړه.

د ایران حکومت د رفسنجاني د وفات له امله ۳ ورځې ملي ماتم او نن سه شنبه (جنوري ۱۰مه) یې د هغه د تدفین مراسمو له‌پاره عمومي رخصتي اعلان کړې ده.

یاده دې وي، چې د ایران پخوانی ولسمشر او وتلی انقلابي لوبغاړی اکبر هاشمي رفسنجاني، د ۱۹۸۹ نه تر ۱۹۹۷ پورې د ایران ولسمشر په توګه دنده ترسره کړې ده.

هغه د خپل ولسمشرۍ څخه وروسته هم په کراره کښې نه ناست او خپلې سیاسي مبارزې ته يې دوام ورکړ.