چهارشنبه / ١٣٩٦ / غوایی - ٦ / ٢٠١٧ کال / اپریل - ٢٦

د کرلینګ ورزشي لوبې فدراسیون پرانیستل شو




 ٢٤ ورۍ ١٣٩٦

محمد ابراهیم مومند د ورزشي برخې مسوول  

د افغانستان د المپیک ملي کمېټې له خوا د فدراسیونونو په ډله کې یو بل د کرلینګ په نوم ورزشي فدراسیون وراضافه شو.

د کرلینګ فدراسیون مشر او د همدې لوبې بنسټ ایښودونکي منور شهزاد پرانیست غونډې ته وویل، کرلینګ په افغانستان کې نوې لوبه ده او تمه لري د کرکټ، فوټبال، تکواندو او فري فایټ په څېر افغانستان کې ژر پرمختګ وکړي.

د المپیک ملي کمېټې مشر ظاهر اغبر د المپیک په چوکاټ کې له کرلینګ فدراسیون څخه ملاتړ اعلان کړ او په خپله یې په دې سیالیو کې د لوبېدو هیله وښودله.

په همدې حال کې د دې فدراسیون مرستیال سمیع الله پام سلام وطندار ته وویل، کرلینګ لوبه د دوو یا درېیو لوبغاړو لوبه ده، چې د یخ او یا د فرش په وسیله ترسره کېږي.

د نوموړي پروینا، دوی اوسمهال په کابل کې ۴ لوبډلې لري چې دوه یې د ښځینه، یوه یې د رسنیو او بله یې هم د نارینه‌وو لوبډله ده.

پام زیاته کړه، د کرلینګ لوبې له‌پاره مناسب میدان نه لري.

دی وايي، د کرلینګ لوبې پرمختګ له‌پاره مالي ملاتړ لري، چې له مخې به یې نه یوازې په کابل بلکې نورو ولایتونو کې هم د پرمختګ له‌پاره کار وکړي.

سمیع الله پام وویل، د کرلینګ لوبه د ژمني المپيک غړیتوب هم لري او دوی به هڅه وکړي دغو سیالیو کې په لوبېدو افغانستان ته د تاریخ لومړی د ژمني المپیک لوبو مډال وګټي.

نوموړي وویل، د ناروې هېواد په کوربتوب د کرلینګ په سیالیو کې یې د افغان لوبغاړو د ګډون بلنلیک ترلاسه کړی او خپل ۲ تکړه لوبغاړي به ډېر ژر ناروې هېواد ته ورلیږي.

د کرلینګ لوبه د لومړي ځل له‌پاره ۴ پېړۍ مخکې په سکاټلینډ هېواد کې ترسره شوه؛ خو په ۱۹۶۶ کال کې ورته په سکاټلینډ کې فدراسیون جوړ کړ، چې دا مهال  له سکاټلینډ هېواده رهبري کېږي.

د کرلینګ لوبه د یخ شطرنج په نوم هم پېژندل کېږي، چې په نړیواله کچه د افغانستان په ګډون ۶۵ هېوادونه د کرلینګ نړیوال فدراسیون غړیتوب لري.