چهارشنبه / ١٣٩٦ / وږی - ١ / ٢٠١٧ کال / آگست - ٢٣

د بلخ ۲۰۹ شاهین قول اردو د تلفاتو په اړه ضد او نقیض راپورونه




 ١ غوایی ١٣٩٦

 

د بلخ ولایت پر ۲۰۹ شاهین قول اردو نن جمعه (اپریل۲۱مه) شاوخوا ۲ بجې د وسله‌والو له‌خوا برید وشو، چې د دغه برید له امله د ملي اردو سرتېرو ته مرګ ژوبله اووښتې ده.

د شاهين قول اردو د قوماندانۍ وياند قهار ارام په دغه برید کې د وژل شويو سربازانو شمېر بیا ۸ او د ټپي شویو سرتېرو تعداد ۱۱ تنه ښودلي دي.

اخوا د ملي دفاع وزارت ویاند دولت وزیري رسنیو ته ویلي، چې بريدګرو پوځي يونيفرم اغوستی وو او د رنجر موټر په واسطه دننه ورغلي و، چې یو يې د امنیتي کسانو له‌خوا پېژندل شوی و او دویم يې د قول اردو ودانۍ ته ننوتی و.

داسې هم ویل کيږي، چې د بریدګرو شمېر ۶ کسان و، چې یو يې نیول شوی او پنځه نور يې وژل شوي دي.

قهار ارام دا هم ویلي، چې یو بریدګرو لومړی د قول اردو ودانۍ په دروازه کې ځان ته چاودنه ورکړی او نور يې بیا په یوه جومات او خوړنځي کې پټ شوی وو او له هغه ځایه یې ډزې کولې.

د بلخ د ولایتي چارواکو له خولې داسې راپورونه خپاره شوي، چې د بریدګرو شمېر ۱۰ تنه و او د برید په پایله کې ۵۴تنه د ملي اردو سرتېري وژل شوي او ۵۸ نور ټپيان دي.

خو ځينې راپورونه بیا د وژل شویو او ټپيانو شمېره له‌دې هم پورته ګڼي.

په بلخ ولایت کې د ۲۰۹ شاهين قول اردو قومنداني د یاد ولایت په دهدادي ولسوالۍ کې پرته ده، چې د افغانستان شمال او شمال ختيځو نهو ولايتونو مسوليت پر غاړه لري.

د ناټو عمومي قوماندان جنرال جان نیکلسن هم برید غندلی او ویلي دي، چې وسله‌والو طالبانو دغه برید د ملي اردو پر جومات کړی دی.

له بل لوري دغه برید د بلخ والي عطامحمد نور له خوا غندل شوی او ویلي يې دي، چې امنیتي او کشفي ارګانونه باید خپلو کارونو ته زیاته توجه وکړي.

د ویلو ده، چې وسله‌والو طالبانو د دغه برید پړه پرغاړه اخیستې او رسنيو ته د یوې خبرپاڼې په لېږلو سره يې ادعا کړې، چې په دغه برید کې يې افغان ملي اردو سرتېرو ته درنه مرګ ژوبله اړولې ده.