شنبه / ١٣٩٦ / لړم - ٢٧ / ٢٠١٧ کال / نومبر - ١٨

عطامحمد نور پر ارګ او سپیدار ماڼیو توندې نیوکې وکړلې




 ٢٥ چنګاښ ١٣٩٦

 

د بلخ اوسنی والي او د جمعیت ګوند اجرایوي مشر عطامحمد نور د ترکيې هېواد څخه له راستنېدو وروسته په مزار شریف ښار کې د یوې غونډې په ترڅ کې پر ولسمشر محمد اشرف غني او اجرايوي مشر ډاکټر عبدالله عبدالله توندې نیوکې وکړلې.

هغه وویل، چې د ملي وحدت حکومت په ادارو کې استبداد خپل وروستي حد ته رسیدلی او اوسنی حکومت یوازې د څو ځانګړو اشخاصو له خوا اداره کيږي.

دغه غونډه، چې  د نوموړي د ملاتړ کوونکو له خوا په مزار شریف ښار کې جوړه شوې وه، پکې عطامحمد نور دا هم وویل، چې افغانان هره ورځ وژل کيږي، خو د حکومت ځينې چارواکي د پېسو پر ټولولو اخته دي.

عطامحمد نور د تدارکاتو کميسیون په غلا تورن کړ او زیاته يې کړه، چې د قراردادونو لړۍ باید په شفاف ډول ترڅېړنې لاندې ونیول شي.

«غله همدغه دي چې د ورځې نوکري کوي او هغه کسان چې ستر قرادادونه ښکته او پورته کوي او د څوکیو پیر او پلور کوي څوک غل دی؟! غله هغه دي چې صلاحیت، واک لري او د تدارکاتو کمیسیون یې په واک کې دی او نړیوال شریکباڼي هم د همدوی جیبونو ته پیسې ورتویوي.»

نور د خپلو خبرو په بله برخه کې وویل، چې د حکومت له اجرایه رییس عبدالله سره یې ځکه اړیکې پرې کړي چې په حکومتوالۍ کې بې واکه او بې وسه دی.

«ته سپیدار ماڼۍ چې د هغو خلکو له وینو دفاع نه شې کولی چې تاته یې رایه درکړې، ته چې د ملي امنیت شورا، کابینې غړی یې، او د وزیرانو شورا په راس کې یې او ددې خلکو بچیان په وینو لمبیږی، د ټانکونو لاندې کیږي او ته یې دفاع نه کوې شرم دی درته چې د معاش او څو سلاکارانو  درلودلو  له پاره په سپیدار ماڼۍ کې ناست یې».

د بلخ والي همدا ډول داحمد ایشچي د جنسي ځورونې په اړه د ولسمشر د لومړي مرستیال عبدالرشید دوستم دوسیه هم سیاسي وبلله.

عطامحمد نور زیاته کړه، چې د افغانستان د ژغورنې ایتلاف عالي شورا په ټولو برخو کې پروګرامونه لري او د ملي یووالي حکومت سمون ته ژمن دی، نوموړی له نړیوالو ملاتړو غوښتنه وکړه، چې ددغه ایتلاف پر وړاندې و نه دریږي.

عطامحمد نور داهم وویل، چې دوی په هیڅ هیواد پورې نه دي تړلي، خو که حکومت کې سمون را نه شی او نړیوال دوستان هم د حکومت پلوي وکړي، د هر هیواد له مرستو به ګټه واخلي.

خو د حکومت ویاندویان وایي، د دغه ایتلاف مشران چې د حکومت غړي دي د حکومت په ټولو لاسته راوړنو او ماتو کې شریک دي.