يک‌شنبه / ١٣٩٦ / سلواغه - ١ / ٢٠١٨ کال / جنوری - ٢١

پکتيا کې سړې هوا د ودانیزو پروژو د کارونو کيفت خراب کړی




 ٢٣ مرغومی ١٣٩٦

 

د پکتيا ځېنې اوسيدونکي او مدني فعالان د دې ولايت په مرکز او نورو سيمو کې د روانو پروژو د کار کيفيت په اړه اندېښنه ښيي او وايي که په ساړه موسم کې د ودانیزو پروژو د کارونو دوام ناوړه پایلې لري.

اوسمهال د پکتيا د اطلاعاتو او فرهنګ، قومونو او قبايلو چارو او کليو پراختيا رياستونو، د کوچيانو  امريت، په زرمت کې د يو لوی جامع جومات او نورو ودانيزو پروژو د جوړونې کارونه روان دي.

مدني فعالان له اړوندو ادارو او چارواکیو غواړي چې دې مهمې مسلې او د کار کيفيت ته  جدي پام وکړي.

د پکتيا مدني فعالان حقمل مسعودزی او محمد انور وايي، د حکومت لويه ستونزه دا ده چې ډېرې پروژې د يخني په موسم کې تطبيقوي چې دا چاره ډېرې ستونزې لري. دوی زیاتوي، یخنۍ کې د پروژو کارونو کيفيت ته زيان رسېږي او تر څنګ يې په پروژو کې کارېدونکيو موادو نه سمه ګټه نه اخیستل کېږي.

دوی غوښتنه کوي چې حکومت دې د ودانیزو چارو پروژې په‌داسې موسم کې قراردادیانو ته ورکړي چې د کار کیفیت او د موادو اصلیت ته په‌کې پام وشي.

د ګردېز اوسېدونکی صادق رباطی هم وايي چې په‌دې موسم کې شوي کارونه ناسم او جوړې شوې ودانۍ ژر بيارغونې ته اړتيا پيدا کوي.

د پکتيا د والي وياند عبدالله حسرت سلام وطندار ته وويل چې د پروژ د کار پر مهال مسلکي انجنيران کار کوي او هر څه له نږدې څاري.

ښاغلي حسرت زیاته کړه، هوا په هغه کچه نه وي سړه چې د پروژ د کار خنډ شي او ټینګار کوي چې کار ته دوام ورکوي او تر اوسه پورې مسلکي انجنيرانو د کار د بندولو او یا ضرورونو په اړه دوی ته نظر نه‌دی ورکړي.

دا یوازې پکتیا نه بلکې په ډېرو ولايتونو کې د لويو پروژو کارونه داسې مهال پيلېږي چې تر ډېره مناسب نه وي او د کتونکیو په اند تړونوال شرکتونه هم لوټه په اوبو کې ږدي او پرې تېرېږي.