چهارشنبه / ١٣٩٦ / کب - ٢ / ٢٠١٨ کال / فبروری - ٢١

۲۳پړاو ژمنۍ المپیکي سیالۍ سبا پیلیږي




 ١٩ سلواغه ١٣٩٦

محمد ابراهیم مومند د ورزشي برخې مسوول  

د سویلي کوریا په کوربتوب ۲۳ پړاو ژمنۍ المپیکي سیالۍ سبا د سلګونو لوبغاړو په شتون کې په «پیونګ چانګ» ښار کې پیلیږي.

د ورکړل شویو معلوماتو له‌مخې، د سږکال په ژمنیو المپیکي سیالیو کې به له ۹۲ هېوادونو ۲ زره او ۹۵۲ لوبغاړي په ۱۵ بېلابېلو ورزشي رشتو کې لوبې ترسره کړي.

د افغانستان المپیک ملي کمېټې د معلوماتو له‌مخې، د افغانستان د سکي فدراسیون ۲ لوبغاړو سید علي شاه فرهنګ او سجاد حسیني ته چې په دې سیالیو کې د افتخاري لوبېدو لومړنۍ ژمنه شوې وه اوس په دې سیالیو کې ګډون نه لري.

ویل کېږي دغه سیالۍ به یو ځل بیا د سکي، یخ په سر هاکي او کرلینګ لوبې ته د مینه‌والو پام په نړیواله کچه راواړوي او د دې لوبو په پرمختګ کې به رول ولوبوي.

د سږکال ژمنیو المپیکي سیالیو ټول پام به د دواړو شمالي او سویلي کوریا ګډې ښځینه هاکي لوبډلې ته وي چې ټاکل شوې ده د یخ په سر هاکي سیالۍ کې د راتلونکې شنبې په ورځ له سویس هېواد سره سیالۍ وکړي.

دواړه کوریاګانې له ۱۹۵۰ کال جنګ وروسته ترینګلې اړیکي لري خو د سږکال په ژمنیو المپیکي سیالیو کې یې د ګډ لوبېدو پرېکړه کړې ده.

په پیلیدونکیو ژمنیو المپیکي سیالیو کې به د لومړي ځل له‌پاره د جمیکا هېواد ښځینه لوبغاړې او دغه راز د نایجیریا هېواد څخه ۳ لوبغاړې په ژمنیو المپیکي سیالیو کې ګډون وکړي.

د ۲۰۱۶ کال اوړي المپیکي سیالیو څخه یوازېنی لوبغاړی د ټونګا هېواد څخه پيتا دی چې خپل ورزش یې بدل کړی او د سږکال په ژمنیو المپیکي سیالیو کې به د خپل هېواد په استازیتوب د یوازېني لوبغاړي په توګه په صحرایي سکي سیالیو کې برخه واخلي.

د افغانستان د سکي فدراسیون ۲ لوبغاړو سید علي شاه فرهنګ او سجاد حسیني ته چې په دې سیالیو کې د افتخاري لوبېدو لومړنۍ ژمنه شوې وه اوس په دې سیالیو کې ګډون نه لري.

ژمنۍ المپیکي سیالۍ هر څلور کاله وروسته په یو غړي هېواد کې ترسره کېږي چې ورته داځل د سویلي کوریا ترڅنګ المان او فرانسه هېوادونه هم نوماند وو خو سویلي کوریا د ۶۳ رایو په ګټلو د سیالیو د کوربتوب حق ترلاسه کړ.

بل خوا ایران او شمالي کوریا خپل لوبغاړي منع کړي چې د ملګرو ملتونو له‌خوا په دواړو هېوادونو د بندیزونو په غبرګون کې د جایزو په توګه مبایلونه وانه‌خلي.

ویل کېږي چې سمسنګ مبایل شرکت د ژمنیو المپیکي سیالیو مسوولینو ته ۴ زره ځیرک مبایلونه ډالۍ کړي چې د هر مبایل قیمت ۹ سوه ډالر ښودل شوی دی ترڅو یې د هېوادونو په مسوولینو او لوبغاړو ووېشي.

د ۲۰۱۴ کال ۲۲ پړاو ژمنۍ المپیکي سیالۍ د روسیې په سوچي ښار کې ترسره شوې چې په کې کوربه روسیې لومړی، ناروی دویم او کاناډا دریم مقام ترلاسه کړ.