دوشنبه 1396 - ییل 1 - سَنجه‌م|عقرب / 2017 - اکتوبر 23 گه توغری

غورده قانون حاکم سیزلیگی سبب کوکنار ایکینی کوپه‌یگن




 ١ اوسیم|ثور ١٣٩٦

 

غور ولایتی مدنی فعال‌لر و مخدره ماده‌گه قرشی کوره‌ش اداره مسؤول‌لری‌نینگ ایتیشیچه، افغانستان قانونلریده کوکنار ایکینی جرم سنله‌دی، بیراق حاضرگه‌قدر، امنیتی کوچلر هیچ بیر کیشی‌نی مخدره ماده قاچاقی و ایشلب چیقاریشی خصوصیده عیب‌لب قولگه آلمه‌گن. اولرنینگ ایتیشیچه، اوشبو ولایت‌ده کوکنار ایکینی آلدی آلینیشی توغریسیده دولت هیچ بیر ایش قیلمه‌گن.

سلام‌وطندار بیلن صحبت اوتکزگن غور ولایتی‌نینگ مخدره ماده‌گه قرشی کوره‌ش اداره‌سی باشلیغی محمدیوسف وکیلی‌نینگ ایتیشیچه، غور ولایتی‌ده قانون حاکم سیزلیگی سبب، بو ییل ولایت ایکینچی‌لریدن کوپینچه‌سی مرکز و تومن‌لرده کوکنار ایکینی‌گه یوز کیلتیرگن‌لر. اونینگ ایتیشیچه، کوکنارگه بدیل یوقلیگی و قانون عمل‌گه آشیریلمه‌گنی باعث، ایکینچی‌لر قورقمس‌دن کوکنار ایکه‌دیلر.

جناب وکیلی‌گه کوره، اولر اوشبو ولایت‌ده کوکنار ایکینی آلدی آلینیشی خصوصیده، کمپاین یولگه قویگن‌لر، بیراق اونچه‌لیک نتیجه بیرمه‌گن.

غور ولایتی مخدره ماده‌گه قرشی کوره‌ش اداره باشلیغی‌نینگ آگاه‌لنتیریشیچه، اوشبو ولایت‌ده مخدره ماده ایکینی و قاچاقی‌نینگ آلدی آلینمه‌گن صورتده، غور یشاوچی‌لریدن کوپینچه‌سی بنگی بوله‌دیلر.

شونینگ‌دیک، غور مدنی فعال‌لریدن بیرقطاری، ولایت‌ده مخدره ماده قاچاقی و ایکینی کوپه‌یگنی‌دن خواطر بیلدیریب ایتیشیچه، مخدره ماده‌گه قرشی کوره‌ش خصوصیده، جدی اراده بولمه‌گنی سبب، اجتماعی قیین‌چیلیک‌لر و ناتینچلیک‌لر کوپه‌یگن.

عین حالده، غور حاکمی سوزلاوچیسی عبدالحی خطیبی‌نینگ ایتیشیچه، کم بغل‌لیک، اقتصادی کم‌چیلیک‌لر و ایش سیزلیک باعث، اهالی کوکنار ایکینی‌گه یوز کیلتیرگن.

غور ولایتی‌نینگ مخدره ماده‌گه قرشی کوره‌ش اداره‌سی تامانیدن بیریلگن رقم‌گه کوره، اوشبو ولایت‌ده کمیده 50 مینگ کیشی مخدره ماده‌گه چالینیب بنگی بولگن و بو رقم کوپیماقده دیر.