سه‌شنبه 1396 - ییل 28 - تیریم|سنبله / 2017 - سپتمبر 19 گه توغری

ترورچی گروهلر رهبرلرینی هوادن نشانگه آلیش دوام ایتیشی لازم




 ٢٥ بیشیم|سرطان ١٣٩٦

محمدعالم کوهکن یازووچی و شاعر  

داعش نینگ افغانستان قناتی رهبری ابو سعید مملکت شرقیده قتل ایتیلگن. پنتاگون جمعه کونی داعش نینگ افغانستان قناتی رهبری ابو سعیدنی مملکت شرقیده جایلشگن کنر ولایتی‌ده هلاک ایتیلگنی باره‌سیده خبر بیرگن ایدی. پنتاگون گه کوره ابوسعید و باشقه بیر نیچه کیشی داعش جنگریلری جاری میلادی آی نینگ اون بیرینچی کونی اقش حربیلری هوا هجومی نتیجه‌سیده نابود ایتیلگن.

افغانستان ملی مدافعه وزیرلیگی سوزچیسی جنرال دولت وزیری داعش نینگ افغانستان قناتی رهبری ابو سعید نابود ایتیلگنی‌نی تصدیقلب اونینگ اولیمی مذکور گروه اوچون ققشتغیچ ضربه بولدی دیدی.

"هر قنده‌ی جنگری گروه رهبری‌نینگ نابود ایتیلیشی اوشبو گروه اوچون کتّه ضربه سنه‌له‌دی. داعش‌نینگ افغانستان قناتی رهبری قتل ایتیلیشی افغانستان دولتی اوچون کتّه موفقیت سنه‌له‌دی. بوندن آلدین داعش نینگ افغانستان قناتی حافظ سعید و عبدالحسیب نابود ایتیلگنی‌ده مذکور گروه اولرنینگ اورنینی تیز آره ده تولدیره آلمه‌گن ایدی." دیدی جنرال وزیری.

پنتاگون تامانیدن ترقتیلگن خبر نامه‌ده افغانستان شرقیده داعشچیلر رهبری نابود ایتیلیشی مذکور گروه‌گه کتّه ضربه ایکنی قید ایتیلگن. بوندن اوچ آی آلدین داعش‌نینگ افغانستان قناتی رهبری عبدالحسیب شونینگدین چمه‌سی بیر ییل آلدین داعشچیلرنینگ افغانستان بوییچه آلدینگی رهبری حافظ سعیدلر اقش حربیلر هوا هجومی نتیجه‌سیده یوق قیلینگن ایدیلر.

افغانستان خوفسیزلیک ارگانلری رسمیلری‌نینگ ایتیشلریچه داعش جنگریلری‌نینگ اساسی قرارگاه‌لری مملکت شرقی ولایتلری جمله‌دن کنر و ننگرهارده جایلشگن. افغانستان اوتگن ییلی داعش‌گه قرشی خلق ارا کوالیتسیه‌گه کیرگن ایدی. مذکور ائتلاف 60 مملکت اشتراکیده تشکیل ایتیلگن. امریکا حربیلری بوندن چمه‌سی اوچ آی آلدین افغانستان شرقیده داعش جنگریلری نینگ قرارگاهلریدن بیریده ایلک بار بمب‌لر آنه‌سی دیب آتلگن اینگ اولکن بمب استعمال ایتگن ایدی. اوشبو حمله نتیجه‌سیده یوز کیشی اطرافیده داعش جنگریلری هلاک ایتیلگنی باره‌سیده خبر قیلینگن ایدی.

 

افغانستان‌ده داعش گروهی فعالیتی منطقه دولتلری اینیقسه مرکزی آسیا مملکتلر، ایران، روسیه و چین نی قتیق چوچیتگن. افغانستان شمالی ولایتلریده مذکور گروه فعالیتی انچه دن بیری کوزه‌ تیلگن. شمالی فاریاب، جوزجان و سرپل ولایتلری داعش جنگریلری‌نینگ شمالده‌گی اساسی فعالیت مرکزی حسابلنه‌دی.

مذکور جنگریلر آره‌سیده چیت ایللیک ترورچیلر جمله‌دن اوزبیکستان اسلامی حرکتی جنگریلری بارلیگی تأکیدلنه‌دی. روسیه انچه‌دن بیری داعش جنگریلری فعالیتی نینگ آلدینی آلیش اوچون پاکستان همکارلیگیده طالبلرنی قوللب قوتلب کیله یاتگنی هم ایتیله‌دی. یقینده شمالی جوزجان ولایتی نینگ درزاب تومنیده داعش بیلن طالبلر اورته‌سیده یوز بیرگن جنگلرده ایکله تاماندن قطار جنگریلر نابود ایتیلگن ایدی.

روسیه داعش‌نی افغانستان‌ده غرب دولتلری حمایت ایته یاتگنی‌نی تخمین قیله دیلر. رسمی مسکو کیینگی آیلر ایچیده افغانستان نینگ جنگریلر نظارتیده بولگن ایریم حدودلریده نا تنیش تیک اوچرلر قونگنی باره‌سیده خبر بیرگن. اما، افغانستان دولتی هلیگچه اوشبو خبرنی تصدیقله‌مه‌گن.

امریکا حربیلرینی افغانستان شرقیده داعش قرارگاهلریگه ضربه بیریب مذکور گروه رهبرلرینی نشانگه آلیب کیله یاتگنی روسیه و باشقه بیر قطار سیاسی تیوره کلر نی امریکانی افغانستان‌ده داعش‌نی حمایت ایته یاتگنی باره‌سیده گی شک شبهه‌لرینی رد قیله‌دی.

یقینده افغانستان باره‌سیده ترامپ مأموریتی نینگ ینگی ستراتیژی سینی اعلان ایتیشی تأکیدلنه‌دی. معلوم که امریکا حربی قوماندانلری سونگی آیلر ایچیده افغانستان بویلب ترورچیلر فعالیتی آشگنی شونینگدیک امنیت وضعیتی یامانلشگنی توغریسیده واشنگتن‌گه خبر بیرگنلر.

اولر مملکت‌ده وضعیت‌نی یخشیلش اوچون امریکا حربی کوچلرینی ینه بیر بار افغانستان‌گه قه‌یتیشی ضرورتینی تکرارلب کیلگنلر. ترامپ مأموریتی نینگ افغانستان بوییچه ینگی ستراتیژیسی اساسیده بیر نیچه مینگ کیشی امریکا حربیلرینی افغانستان‌گه جایلشتیریلیشی کوتیله‌دی. عین حالده امریکا دولتی یقین کیله‌جکده افغانستان هوا کوچلرینی امریکا حربی طیاره‌لری بیلن جهازلشی باره‌سیده هم وعده بیرگن.

افغانستان‌ده وضعیت‌نی درست بیر شکلده نظارت قیلیش اوچون افغانستان دولتی اینیقسه مملکت حربی کوچلرینی ناتو و غرب دولتلری‌نینگ هر تامانلمه حمایتلری کتّه احتیاجی بارلیگی سیزیله‌دی. اینگ اولا امریکا هوا کوچلری‌ جنگ میدانلریده افغانستان حربی کوچلرینی هوا آرقلی حمایت ایتیب ترورچیلرنینگ اساسی مرکزلریگه محکم ضربه‌لر بیریشی اوته ضرور.

کیینگی کونلرده ائتلاف کوچلرینی قندوز ولایتی‌ده طالبلر قرارگاه لرینی هوا دن نشانگه آلیب کیله یاتگنی ایتیله‌دی. مملکت شرقیده داعش نینگ افغانستان قناتی رهبری ابو سعیدنی امریکا هوا کوچلری هجومی نتیجه‌سیده اولدیریلیشی هم امریکا حربیلری نینگ افغانستان‌ده ترورچی گروه‌لر جمله‌دن داعش‌گه ضربه‌لر بیریش برنامه‌سی جدی ایکن لیگیدن دلالت بیره دی.

سونگی ایکّی ییل ایچیده افغانستان شمالی‌ده هم امنیت وضعیتی کوتیلمه‌گن درجه‌ده یامانلشگن. کتّه ترانسپورت قناو یوللری امنیتی کون سه یین طالبلر جنگریلری تامانیدن بوزیلیب باریلماقده. قطار قیشلاقلر جنگریلر اشغالی‌گه اوتگن. حاضرگی کونده داعش و باشقه ترورچی گروهلر رهبرلری و مهم قوماندانلرینی هوا آرقلی نشانگه آلینیب هلاک ایتیلیشی هم مذکور گروهلر مورالی‌گه سلبی تأثیر اوتکزه‌دی.

دولت همده امریکا کوچلری ترورچیلر رهبرلرینی نشانگه آلیش عملیاتلرینی تیزلشتیریشی و اوزلوکسیز روشده دوام بیریشی مهم سنه‌له‌دی. اما مملکت‌ده حقیقی برقرارلیکنی تأمینلش اوچون دولت و خلق ارا کوچلری اساسی ستراتیژی ایشلب چیقیب عمل قیلیشلری حیاتی مسئله حسابلنه‌دی.