سه‌شنبه 1396 - ییل 25 - اولچاو|ميزان / 2017 - اکتوبر 17 گه توغری

افغان – تورک مکتب‌لری تقدیری هلی هم قارانغو




 ٢٧ تیریم|سنبله ١٣٩٦

محمدعالم کوهکن یازووچی و شاعر  

تورکیه‌نینگ رواجله‌نیش و همکارلیک اداره‌سی یا تیکا افغانستان‌ده فعالیت آلیب باره‌دیگن افغان-تورک مکتب‌لریده ترورچی‌لیک مفکوره‌سی ترغیب ایتیله یاتگنینی ادعا قیلیب، رسمی کابلدن مذکور مکتب‌لر فعالیتی‌نی توخته‌تیشینی سوره‌دی. در واقع انچه‌دن بیری تورکیه دولتی رسمی کابلدن افغانستان‌ده فعالیت آلیب باره‌دیگن افغان-تورک مکتب‌لرینی یاپیشی‌نی سوره‌ب کیلماقده، اما ایلک بار تورکیه دولتی‌گه قره‌شلی بیر اداره مذکور مکتب‌لرنی ترورچی‌لیک مفکوره‌سینی ترغیب ایته یاتگن‌لیککه عیبله‌دی.

افغانستان‌نینگ هرات ولایتی‌ده تیکا محلی اداره‌سینی باشقره‌دیگن علی ارغون چینار مخبرلر بیلن اوتکزگن ملاقاتی چاغیده افغانستان دولتی‌نی تیزده مذکور مکتب‌لرنی یاپیشی باره‌سیده امید بیلدیردی. علی ارغون چینار افغان-تورک مکتب‌لری ترورچی بیرگروه تامانیدن باشقیریلماقده دیدی:

اونگه کوره افغان – تورک مکتب‌لری رهبریتی مسوولیتی‌نی تورکیه دولتی‌گه تاپشیریش مذکور مکتب‌لر یاپیلیشی‌گه آلیب کیلمه‌یدی، بلکه بو مکتب‌لرده تعلیم آله‌دیگن اوقووچیلر اوچون تیکین‌گه صفتلی تعلیم آلیش شرایطی مهیا ایتیله‌دی. 

افغانستان دولتی هم بوکونگه قدر مملکت‌نینگ ایریم ولایتلری جمله‌دن پایتخت کابلده فعالیت آلیب باره‌دیگن افغان – تورک مکتب‌لریده ترورچی‌لیک مفکوره‌سی ترغیب ایتیله یاتگنی حقیده بیران نرسه دیمه‌گن. 

افغان-تورک مکتب‌لریده تعلیم آله‌دیگن اوقووچی‌لرنینگ آته آنه‌لری مذکور مکتب‌لر یاپیلیشی‌نی ایسته مه‌یدیلر. بوندن آلدین هم فرزندلری افغان – تورک مکتب‌لریده تعلیم آله‌دیگن عایله‌لر بیر نیچه بار ییغین‌لر اوتکزیب افغان-تورک مکتب‌لری فعالیتی دوام ایتیشی ضرورتی باره‌سیده تأکیدله‌گن ایدیلر.

افغانستان معارف وزیرلیگی بوندن آلدین افغان-تورک مکتب‌لری فعالیتی باره‌سیده راضی‌لیک بیلدیرگن حالده مذکور مکتب‌لر تقدیری مملکت رهبری قراریگه باغلیق‌لیگی‌نی بیلدیرگن ایدی. 20 ییلدن بیری افغانستان‌ده فعالیت آلیب باره‌دیگن افغان-تورک مکتب‌لریده حاضرگی کونده کمی‌ده 8 مینگ کیشی افغان اوقووچیلر تعلیم آلماقده‌لر. 

معلوم که افغانستان‌ده فعالیت آلیب باره‌دیگن افغان-تورک مکتب‌لری تورکیه‌لیک اسلام شناس فتح‌الله گولن‌گه وفادارتشکیلات تامانیدن حمایت ایتیله‌دی. رسمی انقره گولن‌نی اوتگن ییلی تورکیه‌ده دولت تونتریشی حرکتی‌گه قولی بولگن‌لیککه عیلبه‌گن.

سونگی ییللر ایچیده افغان–تورک مکتب‌لریده اوقیگن اوقووچیلر کانکور سیناوولریده کته مؤفقیت قازانیب مذکور مکتب‌لرنینگ کانکورده قتنشگن اوقووچیلرنینگ اینگ کته قسمی افغانستان عالی اوقوو یورتلری‌گه کیریشگه امکان تاپگنلر.

ایتیب اوتیش لازم که مذکور مکتب‌لر باشقرووی تعلیم ساحه‌سیده دنیا بویلب کته تجربه‌گه ایگه. بیر نیچه ییل‌دن بیری افغان – تورک مکتب‌لری‌نینگ خلق ارا المپیادلرده اشتراک ایته‌دیگن اوقیتووچیلری مهم مدال‌لر قولگه کیریتیب اوز وطن‌لری‌گه قه‌یتیب کیلگنلر.

جنرال دوستیم و افغان – تورک مکتب‌لری تقدیری

بیر نیچه آی دیر که افغانستان جمهور رییسی‌نینگ بیرینچی اورین باسری جنرال عبدالرشید دوستیم نا معلوم سببلرگه کوره تورکیه‌ده قالماقده. دوستیم‌نینگ تورکیه‌ده قالیشی بیلن افغان تورک مکتب‌لری یاپیلیشی علاقه‌دار ایکنی حقیده میش – میشلر موجود. ایتیلیشیچه رسمی کابل تورکیه حکومتی دوستیم‌نی نا معلوم مدت‌گه قدر تورکیه‌ده سقلب قالگنده گینه افغانستان دولتی مذکور مکتب‌لر رهبریتی‌نی تورکیه معارف جمغرمه‌سیگه تاپشیره‌دی. بو توغریده نه تورکیه و نه هم افغانستان‌گه قره‌شلی بیران بیر رسمی منبع بیران نرسه دیمه‌گن.

هرات‌ده ژورنالیست‌لر بیلن ملاقات اوتکزگن "تیکا" رسمی‌سی علی ارغون چنارگه بو توغریده بیریلگن سوال‌گه او، جوابی یوق‌لیگی‌نی بیلدیرگن ایدی.

فرزندلری افغان – تورک مکتب‌لریده تعلیم آله‌دیگن افغان عایله‌لری هم افغانستان دولتی‌دن بار – بار افغان – تورک مکتب‌لری تقدیرینی سیاسی اویینلرگه باغله‌مس‌لیگینی سوره‌گن ایدیلر. 

ایریم رسمی و نا رسمی منبع‌لرگه کوره سونگی آیلر دوامیده تورکیه هیئتی بیر نیچه بار کابل‌گه سفر قیلیب افغان – تورک مکتب‌لری و باشقه مسئله‌لر باره‌سیده افغانستان بلند مرتبه‌لی رسمی‌لری بیلن مذاکره قیلگنلر. اما هلی گچه مکتب‌لر مسئله‌سی باره‌سیده سونگی بیر توختم‌گه کیلیشیلمه گن. قربان بیره می‌دن آلدین انقره‌دن کابلگه کیلگن تورکیه هیئتی جمهور رییس غنی‌دن جنرال دوستیم‌گه کابل‌گه قه‌یتیب کیلیب، اوز ایشی‌گه دوام ایتدیریشی باره‌سیده رخصت بیریشینی تقاضا قیلگن. اما جمهور رییس محمد اشرف غنی بو باره‌ده راضی‌لیک بیلدیرمه‌گن.

گرچند تیکا نماینده‌سی تیز آره‌ده افغان – تورک مکتب‌لری تقدیری بیلگی‌لنیب، مذکور مکتب‌لر باشقرووی تورکیه دولتی‌گه تاپشیریلیشی باره‌سیده امید بیلدیرگن بولسه‌ده، هلی هم مسئله‌نینگ قچان و قنده‌ی ییچیلیشی قارانغو.