جمعه 1396 - ییل 24 - یاغیم|قوس / 2017 - دسمبر 15 گه توغری

ترامپ بیت‌المقدس‌نی اسراییل پایتختی دیب تن آلدی




 ١٦ یاغیم|قوس ١٣٩٦

محمدعالم کوهکن یازووچی و شاعر  

امریکا جمهور رییسی دونالد ترامپ چهارشنبه 6 – دسمبر بیت‌المقدس‌نی اسراییل پایتختی اوله‌راق رسماً تن آلگنی‌نی اعلان ایتدی. عین حالده او امریکانینگ تل ابیب ده‌گی ایلچی‌لیگی‌نی بیت‌المقدس گه کوچیریشی باره سیده هم وعده بیردی.

آق اویده چیقیش قیلگن دونالد ترامپ: "کانگرس 1995 ییلی فدرال دولتی بیت‌المقدس‌نی اسراییل پایتختی صفتیده تن آلیشی باره‌سیده قرار قبول قیلگن ایدی؛ 20 ییل‌دن بیری امریکا جمهور رییس‌لری بیت‌المقدس‌نی اسراییل پایتختی اوله‌راق رسماً تن آلیش‌نی همده امریکانینگ اسراییل‌ده‌گی ایلچی‌لیگی‌نی مذکور شهرگه کوچیریش‌نی آرقه گه قالدیریب کیلگنلر" دیدی.

ترامپ، ایندی بیت‌المقدس‌نی اسراییل پایتختی دیب ایتیش وقتی کیلگنی‌نی بیلدیریب؛ مین اونی اسراییل پایتختی دیب اعلان ایته من دیگن سوزلرنی تیلگه آلدی.

او، امریکا ایلچی‌لیگی‌نی بیت‌المقدس‌گه کوچیریش توغریسی‌ده امریکا تشقی ایشلر وزیرلیگی‌گه بویروغ بیرلگنی‌نی تاکیدلب، کیله‌سی ییل‌لر دوامیده مذکور ایلچی‌خانه بنا قوریلیشی‌نی معلوم قیلدی. ترامپ‌گه کوره اسراییل باش وزیرلیگی، کنیستی و وزیرلیکلری مذکور شهرده فعالیت آلیب باره‌دیلر.

ترامپ، بیت‌المقدس‌نینگ معنوی مقامی‌گه نقصان ییتکزیش اوچون بونده‌ی بیر عمل‌گه قول اورمه‌گنی‌نی بیلدیریب، انچه‌دن بیری اسراییل بیلن فلسطین اورته‌سیده تینچ‌لیک جریانی توختب قالگنی‌گه هم اشاره قیلدی. عین حالده او تامانلر ارا تینچ‌لیک‌نی تأمینلش و موجود نزاع‌لرگه سیاسی یوللر آرقه‌لی برهم بیریلیشی‌گه وفادار قالیشی‌نی تیلگه آلدی. ترامپ یقینده امریکا جمهور رییسی اورین باسری مایک پنس منطقه گه سفر قیلیب، تینچ‌لیک جریانی‌نی قیته باشله‌تیشی‌نی بیلدیردی.

اسراییل باش وزیری بین یامین نتن یاهو دونالد ترامپ عملی‌نی خوش قرشی‌لیب، اونی "تاریخی بیر حرکت" دیب بهاله‌دی. نتن یاهو باشقه دولت‌لرنی هم امریکاگه ایرگه‌شیشلرینی تقاضا قیلدی.

ترامپ‌نینگ اوشبو عملی ایریم دولت‌لر تامانیدن عکس‌العمل‌لرگه روبه‌رو بولماقده. فرانسه جمهور رییسی امانوئل ماکرون تامانلرنی زوراوانلیکلرگه یول قویمس‌لیککه چقیریب، بیت‌المقدس مسئله‌سی فلسطین و اسراییل ارا مذاکره‌لر آرقه‌لی حل ایتیلیشی لازم‌لیگی اوستیده تأکیدله‌دی. ماکرون رسمی پاریس‌نی دونالد ترامپ قرارینی قوللب قوتله مس‌لیگی‌نی بیلدیردی. او مذکور قرارنی "تأسفلی" دیدی. فلسطین مختار دولتی باشلیغی محمود عباس تیز آره‌ده ترامپ‌نینگ سونگی قراری توغریسی‌ده رسمی بیانات ترقتیشی‌نی بیلدیرگن. 

تورکیه جمهور رییسی بیر نیچه کوندن بیری بیت‌المقدس رسمی انقره‌نینگ قیزیل چیزیغی ایکنی‌نی تاکیدلب کیلماقده. او، دونالد ترامپ‌نینگ سونگی قراری کوتیلمه‌گن عاقبتلرگه آلیب کیلیشی باره‌سیده آگاهلنتیردی.

اردن قیرالی عبدالله گه کوره: " اوشبو قرار تینچ‌لیک مذاکره‌لرینی پوچگه چیقره‌دی و جدی عاقبتلرگه سبب بوله‌دی. مسلمانلرنی هم کریستیان‌لرنی هم جنبش‌گه کیلتیره‌دی."  

شو پیت گچه باشقه هیچ بیر مملکت بیت‌المقدس‌ده اوز  ایلچی‌خانه‌سینی آچگنی یوق. امریکا دولتی‌ده هم بیت‌المقدس باره‌سیده همه بیر فکرده ایمس. امریکا جمهور رییسی اورین باسری مایک پنس و امریکانینگ اسراییل ده‌گی ایلچی‌سی دیوید فریدمن بیت‌المقدس‌نی اسراییل پایتختی صفتی‌ده تن آلینیشی همده امریکا ایلچی‌خانه‌سی‌نی بو شهرگه کوچیریلیشی‌گه طرفدار بولسه‌لرده، امریکا تشقی ایشلر وزیری ریک تیلرسن و مدافعه وزیری جیم متیس امریکا ایلچی‌لیگی‌نی بیت‌المقدس‌گه کوچیریلیشی‌گه قرشی چیقماقده‌لر. امریکا دولتی‌نینگ ایریم منصبدارلری کیم‌لیکلری فاش ایتیلمس‌لیگی شرطی بیلن بو باره‌ده خبر بیرگنلر.

ترامپ‌نینگ سونگی قراری منطقه بویلب حکم سوره‌دیگن موجود وضعیت‌گه برهم بیریشی ممکن. اوشبو قرار اسراییل بیلن امریکا اورته‌سیده‌گی دوستانه مناسبتلرنی مستحکم‌لش‌گه آلیب کیلسه-ده، رسمی واشنگتن بیلن اسلام دولت‌لری اینیقسه عرب مملکت‌لری مناسبتلری ساووقلشیشی‌گه آلیب کیله‌دی. عین حالده ایران‌نینگ اسلام عالمی قاله‌بیرسه منطقه دولت‌لری ارا حرمت – اعتباری‌نینگ  آشیشی‌گه سبب بوله‌دی.  

ترامپ‌نینگ امریکا ایلچی‌خانه‌سینی بیت‌المقدس‌گه کوچیریلیشی باره‌سیده‌گی سونگی قراری تیز آره‌ده اونگه معین بیر فایده کیلتیریشی نامعلوم. اما، نوبتده‌گی سیلاولرده هم دونالد ترامپ ایکینچی مرته آق اویده قالیشی‌نی ایسته‌یدی. دونالد ترامپ حاضردن یهودلرنینگ امریکاده‌گی نفوذینی اوز فایده‌سیگه ایشله‌تیش اوچون بونده‌ی بیر قرار قبول قیلگن بولیشی ممکن.

رسمی واشنگتن امریکانینگ تل ابیب ده‌گی ایلچی‌خانه‌سینی بیت‌المقدس‌گه کوچیریش کمیده تورت ییل وقت آلیشی‌نی تأکیدله‌گن. کیله‌سی ییل‌لرده ترامپ اورنی‌گه امریکا جمهور رییسی ایتیب سیلنه‌دیگن  باشقه بیر کیشی بو توغریده تیسکری قرارلر قبول قیلیشیی هم احتمال‌دن ییراق تویولمه‌یدی.